នៅថ្ងៃទី២៨ ខែវិច្ឆកា ឆ្នាំ២០២៤ គណៈគ្រប់គ្រងសាលារៀន អន្តរទ្វីប អាមេរិកាំង សាខាសែនសុខ បានរៀបចំដឹកនាំសិស្សានុសិស្សថ្នាក់ទី៦ ទាំងអស់ចុះកម្មសិក្សា​នៅ រមណីយដ្ឋានវត្ដភ្នំ ដែលស្ថិត​នៅតាមបណ្ដោយ​មហា​​​វិថី​ព្រះនរោត្ដម សង្កាត់វត្ដភ្នំ ខណ្ឌដូនពេញ រាជធានីភ្នំពេញ។ កម្មវិធីចុះកម្មសិក្សានេះ គឺជាឱកាសមួយសម្រាប់សិស្សានុសិស្សសិក្សាសង្កេតអំពីមហាជន និងបរិស្ថាន​ជុំវិញ។​ លើសពីនេះទៀត ក៏ជាឱកាសដែលសិស្សានុសិស្សទទួលបាននូវចំណេះដឹងជាច្រើនបន្ថែមលើមេរៀនក្នុង​ថ្នាក់​ដូចជា៖ ១.  ស្វែងយល់ពីរមណីយដ្ឋានវត្តភ្នំ ដែលជាទីកន្លែងទាក់ទងនឹងប្រភពដើមកំណើតរាជធានីភ្នំពេញ។ ២. ស្គាល់ស្លាកសញ្ញាចរាចរណ៍មួយចំនួន និងកំណត់សម្គាល់ផ្សេងៗ ដែលប្រើប្រាស់លើ​ដងវិថី។ ៣. ស្គាល់ឈ្មោះទីតាំងភូមិសាស្ដ្រ និងមហាវិថីមួយចំនួនក្នុងរាជធានីភ្នំពេញ។ ៤.  មានបម្រុងប្រយ័ត្នចំពោះការទុកដាក់របស់របរ និងថែរក្សាប្រាក់កាក់របស់ខ្លួនក្នុងពេល​ធ្វើដំណើរ​តាម ទីសាធារណៈ។ ៥.  រឹតចំណងមិត្ដភាព សាមគ្គីភាព បង្កើនភាពក្លាហាន និងបទពិសោធក្នុងការបកស្រាយ ការសហការ ការដឹកនាំ ឯករាជ្យភាព ភាពម្ចាស់ការ ទំនាក់ទំនងក្នុងក្រុម និងទំនាក់ទំនងជាមួយមហាជន​បានកាន់ តែ​ប្រសើរ។ ជាចុងក្រោយ បានឆ្លុះបញ្ចាំងខ្លឹមសារមេរៀន ទទួលបាននូវចំណេះដឹងថ្មីៗ និងអារម្មណ៍ជ្រះថ្លាក្នុងពេល​កំពុងចុះកម្មសិក្សា​​នៅ​ទីនោះ ក៏ដូចជាពេលត្រឡប់​មកគេហដ្ឋានវិញផងដែរ។