នាព្រឹកថ្ងៃទី១៧ ខែសីហា ឆ្នាំ២០២៤ មជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប   អាមេរិកាំង (AIS) បានរៀបចំកម្មវិធី “រត់ដើម្បីសប្បុរសធម៌ជាលក្ខណៈគ្រួសារ” ដោយហៅជាភាសាអង់គ្លេសថា Family Fun Run ។ នៅក្នុងព្រឹត្តិការណ៍នេះ គឺត្រូវបានធ្វើឡើងនៅក្នុងបរិវេណសាកលវិទ្យាល័យភូមិន្ទកសិកម្ម (ចំការដូង) ក្នុងខណ្ឌដង្កោ រាជធានីភ្នំពេញ ដោយមានអ្នកចូលរួមប្រមាណជាជាង ៥០០ នាក់ ហើយនៅក្នុងនោះ ក៏មានគណៈគ្រប់គ្រងសាសា ចាងហ្វាង លោកគ្រូ អ្នកគ្រូ និងបុគ្គលិកគ្រប់ជាន់ថ្នាក់ រួមទាំងសាធារណជនជាច្រើនកុះករផងដែរ។

គួររំលឹកជូនថា ព្រឹត្តិការណ៍រត់ដើម្បីសប្បុរសធម៌ជាលក្ខណៈគ្រួសារ (Family Fun Run) នេះ គឺត្រូវបានរៀបចំឡើង ដើម្បីលើកកម្ពស់សុខុមាលភាព សុខភាព និងការធ្វើលំហាត់ប្រាណជាលក្ខណៈគ្រួសារ ដើម្បីរៃអង្គាសថវិកាជូនមូលនិធិ ម៉េងលី ជេ. គួច ដោយការប្រើប្រាស់ថវិកាក្នុងសកម្មភាពសប្បុរសធម៌ និងជួយដល់សហគមន៍ចំការដូង ព្រមទាំងផ្តល់ឱកាសដល់គ្រូបង្រៀន ដើម្បីអាចចូលរួមក្នុងសន្និសីទនៃការបង្រៀនថ្នាក់ជាតិ។

                  

នៅក្នុងកម្មវិធីដ៏សប្បាយរីករាយនោះ លោកស្រី រស់ យ៉ាណា ប្រធានសាលារៀន អន្តរទ្វីប អាមេរិកាំង បានបង្ហាញអំពីសេចក្តីរំភើបរីករាយ ដោយបានចូលរួមជាមួយសិស្សានុសិស្ស និងលោកគ្រូ អ្នកគ្រូជាច្រើន ដែលបានចូលរួមក្នុងកម្មវិធីនោះ។ ហើយមិនត្រឹមតែប៉ុណ្ណោះ កម្មវិធី Family Fun Run នេះ គឺជាសក្ខីភាពមួយ ដែលបញ្ចាក់អំពីការរួបរួម សាមគ្គីភាព នៃបណ្តាដៃគូ និងអ្នកឧបត្ថម្ភ ដើម្បីបុព្វហេតុសង្គម និងសហគមន៍របស់យើង។

យ៉ាងណាក៏ដោយ មជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប អាមេរិកាំង (AIS) តែងតែដឹកនាំសិស្សានុសិស្ស និងលោកគ្រូ អ្នកគ្រូព្រមទាំងបុគ្គលិកទាំងឡាយ ធ្វើសកម្មភាពសង្គមជាប្រចាំ ក្រោមការដឹកនាំប្រកបដោយចក្ខុវិស័យរបស់អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក​ ប្រធាន​​ក្រុម​​ប្រឹក្សា​ភិបាល​ និង​អគ្គនាយក​ប្រតិបត្តិ​ របស់ក្រុមហ៊ុន ម៉េងលី ជេ. គួច អេឌ្យូខេសិន។

គួរជម្រាបជូនថា ព្រឹត្តិការណ៍នោះ គឺចាប់ផ្តើមតាំងពីម៉ោង ០៦:៤៥ រហូតដល់ម៉ោង០៩:០០ព្រឹក នៅសាកលវិទ្យាល័យភូមិន្ទកសិកម្ម ដោយមានការរត់ចម្ងាយចំនួន ៣គីឡូម៉ែត្រ និងមានកីឡាករ កីឡាការិនីប្រមាណជាជាង ៥០០នាក់ ចូលរួម។

                 

សម្រាប់ព្រឹត្តិការណ៍នៅក្នុងថ្ងៃនេះផងដែរ គឺយើងអាចរាប់ទុកថា ជាឱកាសដ៏អស្ចារ្យមួយ ក្នុងការលើកកម្ពស់ដល់សុខភាពទូទៅ និងសុខុមាលភាពសិស្សានុសិស្ស ខណៈពេលដែលការរៃអង្គាសថវិកា គឺដើម្បីគាំទ្រដល់គម្រោងសប្បុរសធម៌របស់មូលនិធិ ម៉េងលី ជេ. គួច។

ជាការពិតណាស់ មជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប អាមេរិកាំង (AIS) គឺជាគ្រឹះស្ថានអប់រំឈានមុខគេមួយ នៅក្នុងព្រះរាជាណាចក្រកម្ពុជា ដែលផ្តល់ជូននូវកម្មវិធីសិក្សា​យ៉ាង​សម្បូរ​បែប តាំងពីថ្នាក់ក្រោមមតេ្តយ្យសិក្សា រហូតដល់ថ្នាក់ទី១២ លើជំនាញភាសា អង់គ្លេស ចិន ថៃ និង​ថ្នាក់ចំណេះដឹងទូទៅខ្មែរ។ ហើយដោយ​ការប្តេជ្ញាចិត្ត​យ៉ាង​មុតមាំ ទៅលើការផ្តល់ជូននូវសេវាកម្មលើវិស័យអប់រំប្រកបដោយគុណភាពខ្ពស់ និងភាពជោគជ័យរបស់សិស្សានុសិស្សជាច្រើន នាពេលកន្លងមក​ ទើបសាលារៀន អន្តរទ្វីប អាមេរិកាំង (AIS) ទទួលបាននូវកេរ្តិ៍ឈ្មោះយ៉ាងល្អ និងមានទំនុក​ចិត្តជាខ្លាំង ពីសម្នាក់មាតាបិតា និងអ្នកអាព្យាបាលសិស្សាទាំងឡាយ។